Arrête ton char Langues & Cultures de l'Antiquité
Perseus et Andromeda
Perseus filius erat Jovis, maximi deorum. De eo multas fabulas narrant poetae. Ei favent dei, ei magica arma et alas dant. Eis telis armatus et alis fretus ad multas terras volabat et monstra saeva delebat et miseris infirmisque auxilium dabat.
Aethiopia est terra Africae. Eam terram Cepheus regebat. Ei Neptunus, maximus aquarum deus, erat iratus et mittit monstrum saevum ad Aethiopiam. Ibi monstrum non solum latis pulchrisque Aethiopiae agris nocebat sed etiam domicilia agricolarum delebat, et multos viros, feminas, liberosque necabat. Populus ex agris fugiebat et oppida muris validis muniebat. Tum Cepheus magna tristitia commotus ad Jovis oraculum properat et ita dicit : « Amici mei necantur ; agri mei vastantur. Audi verba mea, Juppiter. Da miseris auxilium. Age monstrum saevum ex patria. »
Tum oraculum ita respondet : « Mala est fortuna tua. Neptunus, magnus aquarum deus, terrae Aethiopiae inimicus, eas poenas mittit. Sed para irato deo sacrum idoneum et monstrum saevum ex patria tua agetur. Andromeda filia tua est monstro grata. Da eam monstro. Serva caram patriam et vitam populi tui. » Andromeda autem erat puella pulchra. Eam amabat Cepheus maxime.
Cepheus, adversa fortuna maxime commotus, discessit et multis cum lacrimis populo Aethiopiae verba oraculi narravit. Fata Andromedae, puellae pulchrae, a toto populo deplorabantur, tamen nullum erat auxilium. Deinde Cepheus cum pleno tristitiae animo caram suam filiam ex oppidi porta ad aquam duxit et bracchia eius ad saxa dura revinxit. Tum amici puellae miserae longe discesserunt et diu monstrum saevum exspectaverunt.
Tum forte Perseus, alis fretus, super Aethiopiam volabat. Vidit populum, Andromedam, lacrimas, et magnopere attonitus, ad terram descendit. Tum Cepheus ei totas curas narravit et ita dixit : « Parebo verbis oraculi, et pro patria filiam meam dabo ; sed si id monstrum interficies et Andromedam servabis, tibi eam dabo.»
Perseus semper proelio studebat et respondit, « Verba tua sunt maxime grata », et laetus arma sua magica paravit. Subito monstrum videtur ; celeriter per aquam properat et Andromedae adpropinquat. Ejus amici longe absunt et misera puella est sola. Perseus autem sine mora super aquam volavit. Subito descendit et duro gladio saevum monstrum graviter vulneravit. Diu pugnatur, diu proelium est dubium. Denique autem Perseus monstrum interfecit et victoriam reportavit. Tum ad saxum venit et Andromedam liberavit et eam ad Cepheum duxit. Is, nuper miser, nunc laetus, ita dixit : « Tuo auxilio, mi amice, cara filia mea est libera ; tua est Andromeda. » Diu Perseus cum Andromeda ibi habitabat et magnopere a toto populo amabatur.
texte tiré de l’ouvrage Latin for beginners de Benjamin L. D’Ooge, 1909.
